Центр довузовской подготовки г. Миоры

ТЭМА:    А. ДУДАРАЎ  “РАДАВЫЯ”

 

Мэта:  1.  Паглыбіць веды вучняў пра драматычны твор, раскрыць, як      адлюстравана тэма Вялікай Айчыннай вайны ў творы.

Замацаваць навык шматаспектнага аналізу драматычнага твора.

Выхоўваць уважлівага чытача, здольнага разважаць над вечнымі праблемамі чалавечага існавання, мець сваю асабістую пазіцыю.

Абсталяванне:  На дошцы эпіграф:

Калі кожнага савецкага чалавека, што загінуў у бойцы з фашызмам,  ушанаваць мінутай маўчання, давядзецца маўчаць 38 гадоў.

Фотаздымкі і рэпрадукцыі карцін з эпізодамі Вялікай Айчыннай вайны.

З газет.

Ход урока:

 

1. Індуктар:   Гучыць запіс песні “Было ў салдата два полі” у выкананні ансамбля “Песняры”.

- Якія асацыяцыі выклікала ў вас музыка?

(Кожны вучань у класе адказвае. Магчымыя варыянты: вайна, гора, смерць, слёзы, расстанне, пакуты і г.д.)

2. Самаканструкцыя: 

- Якое слова з гэтага ланцужка, на вашу думку, цэнтральнае, з якім звязаны лагічна ўсе астатнія?   Чаму?

(Гэта слова вайна)

Як бы вы ўмоўна-вобразна намалявалі вайну?

(Магчымыя варыянты:  чорная хмара, мяжа, лінія, якая праходзіць праз жыццё чалавека)

Зрабіце малюнак у сшытку так, каб пасярэдзіне старонкі апынулася слова вайна.

Уявіце цяпер, якім было жыццё герояў п’есы да вайны? Запішыце ланцужок апорных слоў злева ад малюнка.

         (магчымыя варыянты:  радасць, сям’я, каханне, праца, дзеці і г.д.)

А цяпер справа ад малюнка запішыце ланцужок слоў, у якім адлюстравана іх жыццё на вайне.

(магчымыя варыянты:  смерць, кроў, страх, вораг, голад, бамбёжкі і г.д.).

          Усё запісанае гучыць услых.

Сацыяканструкцыя: 

Вучні атрымліваюць заданні па групах (да 10 хвілін на выкананне)

Чаму аднаго з герояў п’есы называюць Адуванчык?

Ці маецца на ўвазе толькі знешняе падабенства?

У чым жыццёвая трагедыя старшыны Дугіна? Як вы ставіцеся да яго ілжывай пахаронкі?

Чаму пра Бушцеца гавораць:  “Лепш бы ён загінуў. Нельга жыць з такой спустошанай душой”.

Як вы ставіцеся да адной з хрысціянскіх запаведзей “не ўбій” і як ацэньваеце паводзіна Саляніка?

Як вы разумееце паняцце “грамадзянскі абавязак”? Якое дачыненне яно мае да Дзерваеда?

Сацыялізацыя: 

     Вучні выказваюцца па сваіх групавых заданнях.

Афішыраванне:

     Вучні абмяркоўваюць, якое з групавых выступленняў было больш поўным і глыбокім, робяць неабходныя дапаўненні.

“Разрыў”: 

     Упішыце ў свае сшыткі, што яшчэ нясе людзям вайна, з таго, што вы пачулі пры выкананні заданняў.

(Вучні могуць дапісаць:  жорсткасць, бесчалавечнасць, помста, спустошанасць душы, насілле).

Ці можна ў гэты спіс дапісаць словы: спачуванне, жаласць, узаемавыручка, гуманізм? Ці гэтыя паняцці павінны заняць асобнае месца? Чаму?

“Пластыка”

      Вучням прапануецца прыдумаць і паказаць магчымы варыянт помніка “радавым” мінулай вайны, усім тым, хто ўнёс сваю долю ў вялікую Перамогу.

(Пакуль група рыхтуе гэтае заданне, астатнія тлумачаць сэнс назвы твора “Радавыя”)

Рэфлексія:

      З дапамогай каляровых картак вучні ацэньваюць вынікі ўрока.

 

Чырвоная – спадабалася, застаўся след у душы;

Зялёная – былі цікавымі асобныя элементы ўрока;

Сіняя – было сумна, мне ўсё роўна.

 

                          Дамашняе заданне:

 

Падрыхтаваць паведамленне – разважанне:

Хто яны, героі мінулай вайны? (па творах рускіх і беларускіх аўтараў)

След вайны ў маёй сям’і.

Вайна ў лёсах міёрцаў.